قصيدة معبرة عن البطانة الفاسدة؟؟؟؟

هذي رسالة شاعر ٍ فيـه ولّـوال

حب الوطن والشعب كدر منامـه

يشوف له خلات وهموم وأحـوال

وابيوت فيها العيش ناقص يدامـه

تكفون يا حكامنا الوضـع لا زال

زود البطالـه والعطالـه سقامـه

واعلامنا غايب وهايب ليـا قـال

نايم على ما قيـل نومـة نعامـه

والله ثـم والله مهيـب تمـثـال

مشاعري بالصدق منجى السلامه

اعطيكم الموجز من الألف للـدال

عسـاه يلقالـه قبـول وكرامـه

مما تشوف العين مارتاحلي بـال

ومثلي يشوف وقال واسمع كلامه

نصف البطانه خاينه تنهب أموال

في ظل مشروع ٍ تـزود أرقامـه

تشارك العمال ورجال الاعمـال

ونصف الاوامر مهّمله في القمامه

اتقـدم الأخيـر وفالامرتحـتـال

تأكل حقوق الشعـب بالأبتسامـه

وإن جالها المظلوم يلقاله أنكـال

الباب مغلق والسكرتيـر جامـه

يعطيك علمه قبل تعطيـه سـؤال

قـال المديراليـوم بـرا دوامـه

عنده مقابل واجتماع ٍ على فـال

مع زملاه وماشي ٍ فـي نظامـه

وأثره وراه ابمكتبه فـوق جـوال

يشري يبيع وسابح ٍ في حرامـه

صار المدير معلم النذل الأشغـال

الكذب والتصريف عذر الهلامـه

وان جاء المفتش ما تعدا ولا جال

عند المدير ولا ينـات ٍ عظامـه

ظار ٍ على الجاوي وكيف ٍ بفنجال

ويقـدّم الشكـر وزود العـلامـه

وزاد التسيب والتستر على أفعال

من لا يقوم بواجبـه واحترامـه

وعم الفساد وضيعوا كل الآمـال

من واحد ٍ رقم الوظيـف امامـه

الواسطه للحق هيـف ٍ وسـلال

خلة كثير الشعب فيـه انقسامـه

احد ٍ يصفق مع هـذولا ودجـال

سوسة نخل مهيب سوسة مسامـه

واحد ٍ يقول الحال مستور يا عيال

من عصرنا الأول ليـوم القيامـه

وحكامنا للحق مضْراب الامثـال

ما منهـم اللـي تقتفيـه الملامـه

بقيادة اللي يزحم الجمع لا صـال

صقر الجزيره هيبته من حزامـه

سلطان ابو خالد ونايف له ظلال

وابو فهد فـي منزلتهـم مقامـه

ولا تلحق الشكه مواقيف الأبطال

آل السعـود معصبيـن العمامـه

لاجات للضدات وعنـاد وجـدال

هم عزوة العوجا على كل هامـه

الشرع قايـم والمحابيـل للـذال

والعدل والحكام تجلـى الظلامـه

وأيضا رموز بلادنا مابهم ضـال

هم خيرة الأخيار فيهـم شهامـه

واختامها مهيـب تعبيـر جهـال

وألا كلام ٍ مقتبـس مـن درامـه

هذي مشاعر شاعر ٍ فيه ولّـوال

حب الوطن والشعب كدر منامـه