لكل أم عايزة تقدّم لأطفالها حلويات لذيذة وفي نفس الوقت تكون ضامنة مصدرها، ونضافتها، وقيمتها الغذائية، النهارده هنعمل قوس قزح بالجيلي والزبادي، وطبعا من اسمه باين إن شكله هيكون حلو جدا ومغري للأطفال والكبار كمان..
قوس قزح بالزبادي والجيلي
المقادير:
علب جيلي بكل الألوان المتاحة (أصفر، أحمر، برتقالي، أخضر)
4 ملعقة كبيرة جيلاتين بودرة (هتلاقيه في المحلات اللي بتبيع خامات الحلويات)
كوب زبادي كبير
½ كوب ماء
سكر
الطريقة:
1- حضّري كل لون من ألوان الجيلي اللي عندك بالطريقة المكتوبة على العلبة.
2- دوّبي الجيلاتين في الميه الدافية وسيبيه يبرد شوية، وبعد كده اخلطيه مع الزبادي والسكر، وقلّبيهم مع بعض كويس لحد ما يتجانسوا.
3- هاتي أكواب التقديم الزجاجية، وحطّي فيها طبقة الجيلي الأولى باللون اللي تختاريه، وبعد كده حطّيها في الثلاجة شوية لحد ما تتماسك، وبعد كده حطّي عليها طبقة من خليط الزبادي اللي عملتيه، وشيليها في الثلاجة شوية لحد ما طبقة الزبادي تتماسك، وبعد كده طلّعي الأكواب وكرّري نفس الخطوات مع باقي الألوان لحد ما كل كوب يبقى فيها طبقات بألوان الجيلي اللي عندك كلها، وبعد كده زيني الأكواب بطبقة من الكريم شانتيه، وقدّميها.. وبالهنا والشفا.
وبكده تكون خلصت وصفتنا النهارده..
العرض العادي
