سكون الليل

السلام عليكم ورحمة الله وبركاته
،
’
،
’

مدخل ,,
وش بقالي
غير ذكرى والسهر وأحكي لحالي ,
بقالي غير تقليب المواجع ,
في متاهات الليالي ,
ألتقينا في شهر
وأبتدا فينا السهر
وصارت الأيام تركض
وأفترقنا بعد مادارت سنه
وكانت أيام السعاده ماتساويها سنه
لكن الفرقى الغريبه صارت بنفس الشهر ,,,

على مفرق سكون الليل والذكرى عتبها شين
اسوق اقدامي واحلامي على بالي واجاملها

سريت الليل يوم إن الأماني مالها دربين
وانا قصدي همومي كيف ارتبها واعدلها

اشوف بعين قلبي قبل عيني مدخلي من وين
واميّز وين مخراجي قبل لاجي مداخلها

وليل البارحه قامت همومي كلها صفّين
واقول الله يزيّن مابقى عن ضيقة اوّلها

هواجيس المشاعر ياهواجيس استكنّي لين
تفوح الدله بكيف النشاما واتفنّجلها

وأولّع لي من آلامي ألم وأكنّها ويزين
مزاجي وأطرب لباقي علومي واتساهلها

واقول ان الكلام اللي بداله لازمٍ يبين
وكلمه تستحي منها وهي في حلّها قلها

تعبنا من معاتبنا وشفنا جرحنا جرحين
مثل من يطعن جروحه بروحه ماتجاهلها

نبي ليله على ضحك الحجاج تغمّض العينين
ولكن تبرق بروق الطواري يوم اخايلها

بجنح الليل ياليل السهر يوم البشر ممسين
نشب ضلوعنا ويلوعنا طاري منازلها

مابين القلب والضلع القصير وبين رمش العين
ترى هذي مرابعها وهذي هي مداهلها

ربت فيني وهامت بي وكنّا بالهوى شخصين
وكانت روحنا وحده وعشنا قلوبنا ولهى

تذّكرت اول اللقيا معاها كيف كنّا اثنين
وتذّكرت آخر آمالي معاها يوم أبادلها

بقالي عندها حاجه وهي باسم المحبه دين
ولافيها سحى يوم أطلب ديوني وأحصلها

أبي قلبي تردينه وروحي ياغلا بعدين
وانا من ينتهي وصله حرام إني اواصلها

نسيت إني أنا وأنتي وذكرى في شهر تشرين
وفي نفس الشهر فرقى قلوبٍ ليتها تلهى

وعلى نفس الطريق اللي تفرّع منّه الخطين
أشوف خطوطه وقلبي لعيني قال مطولها

مشيت الخطوه ودربي يلف يسار ولا يمين
ولكن الأكيد ان الهدف نقطه وباصلها

على غفله من الواقع دريت ان الهوى يومين
وتذكرت المهم ان البشر هذا تعاملها

وباقي من سكون الليل في عين السهر بيتين
وجمره قلت أبطفيها سنه بالصدر شايلها

على الله يازمان الذاكره نسلى مع السالين
وننسى ذكرياتٍ باقيه فيني واجاملها


مخرج ,,
ماخذيتي الذكريات ,
يوم رحتي للشتات ,
وش عطيتيني من أيام السعاده
غير ترديد اللي فات ,
هاك كل اللي بقالك من حكايا ,
وهاك بعض حروفك اللي بالخفايا ,
وبترك الكلمه الوحيده
آه ياحرف القصيد
مابقى عندي جديد ,
كل حبرٍ فيها مات ,
ومابقى إلا الذكريات ,,,